في بداية 2023 كنت بدور على دخل إضافي وكنت بشوف ايه الأفكار اللي ممكن تطبق بشكل سريع والعائد يكون مقبول شهريًا، وكنت حابب إن الخدمات اللي تتعمل ماتكونش بتاخد وقت طويل، فخليني أشرح لك أنا عملت ايه لو حابب تكرر نفس النموذج ده.
أولًا: الخدمات:
أول خدمة قدمتها كانت مساعدة الناس في إنها تعمل حساب ChatGPT، كنت في الأول بعملها بشكل مجاني وبعدين لما لقيت الكل بيبعت فقلت أساعد برده على قدر الرسوم اللي بدفعها لخدمة رقم التليفون الأمريكي علشان استقبل رسالة SMS لمرة واحدة وكانت بتكلف تقريبًا 0.75$، فاكر وقتها عملت بوست شرحت في الموضوع علشان الناس تعمل الموضوع بنفسها لكن الناس كانت بتكسل تقرأ وبرده بتبعتلي علشان أعملها الحساب.
بعد شوية لقيت فيه نوعية من الناس مكسلة تعمل حاجة بسيطة زي دي وكأنه استخسار لوقتي مقابل وقتهم وعليه قررت أعملها بتسعير بسيط برده وخليته 5$، وضفت كمان اشتراك ChatGPT Plus وخليت سعره 30$، وكان فيه تركايه وقتها إن كل حساب محتاج يكون له بطاقة بنكية مخصصة لكل عميل علشان التجديد وعلشان أقدر أتحكم في الرصيد كل شهر، وعملت الخدمة وكان فيه ناس بتجدد بالشهور.
بعدين قررت أضيف خدمات تانية زي خدمة مساعد التسوق الشخصي ودي كنت بساعد الناس إنها تشتري بأفضل سعر من أمريكا مقابل رسوم ثابتة للخدمة دي، غير خدمة الشحن الدولي واللي كان ليها برده رسوم حسب كل دولة باستخدام DHL أو البريد الأمريكي أو UPS، والحمد لله الفيد باك كان ممتاز.
بعدها قررت أضيف خدمات تانية زي مساعدة الناس في عمل حسابات Wise وطلب البطاقات وبعدين شحن البطاقة لمصر بالاستعانة بخدمة الشحن الدولي اللي ذكرتها فوق.
كذلك قررت أقدم خدمات التقديم على أنواع فيزا السياحة المختلفة خاصة زي Schengen و US VISA، وغيرها زي خدمات الاستشارات البسيطة.
ثانيًا: التسويق للخدمات:
موقع إلكتروني:
كنت وقتها بدور على ويب سايت أقدر أقدم من خلاله الخدمات دي ويكون سهل وبسيط (أينعم كنت ممكن أعمل موقع للخدمات دي وقتها بس قلت ءأجل الخطوة شوية)، المهم اخترت موقع BuyMeAcoffee (ولو متعرفش الموقع فهو يساعد صانعي المحتوى على إضافة محتواهم وتسويقه بنظام الاشتراكات أو الـ tips اللي بيقدمها الداعمين لصانع المحتوى.)، وكان بالنسبة لي خيار ممتاز علشان أعرض عليه خدماتي المختلفة ويهندل عمليات الدفع بطريقة بسيطة ورسوم الخدمة ماتكونش عالية. وبالتالي ضفت كل الخدمات من خلال خاصية Shop أو المتجر.
استخدام السوشيال ميديا للتسويق:
عملت بوست طويل عريض بتكلم فيه الخدمات اللي بقدمها (هتلاقيه مثبت في حسابي)، وعملت صورة تعبر عن الخدمات دي باستخدام Canva وبس يا سيدي، الدنيا بدأت تشتغل والناس تشارك البوست لوحدها وحاجة آخر حلاوة، والحاجة الحلوة إن الانتشار كان من الناس نفسها بدون ما أطلب من حد يعمل ده، ولما حد يجرب خدمة يروح يقول لصاحبه على الخدمات وبعدين ييجي يطلبها.
عمل ويب سايت شخصي:
بعد فترة من الاعتماد على BuyMeAcoffee لتقديم الخدمات قررت أعمل موقع خاص بالخدمات دي وتعمدت يكون الاسم بسيط وسميته Miniz.me نسبةً إلى إنها خدمات مصغرة وكده يعني، وبسطته بحيث يكون سهل في الاستخدام، والفيدباك كان بيجيلي على كل حاجة في الموقع سواء على طريقة عرض الخدمة أو شرحها إلخ، واستمر التطوير إلى الآن.
كنت بستخدم مدفوعات كذلك على Wise للتحويل السريع، وبعدين استخدمت Stripe للدفع المباشر.
—
ثالثًا: النتائج (خلال الفترة من ١ إبريل ٢٠٢٣ إلى ديسمبر ٢٠٢٣) :
+400 خدمة مباعة
+$18,000 مبيعات.
+ $16,000 أرباح.
رابعًا: لو حد حابب يكرر نفس التجربة بشكل مختلف يعمل ايه؟
لو عندك مهارة بتقدر تعملها على الكمبيوتر أي كان شكلها وحسب تخصصك، تقدر تكرر النموذج ده بأشكال مختلفة وفيه مواقع* وأدوات كتير ممكن تساعدك.
BuyMeAcoffee.com
لعرض خدماتك وتسويقها على السوشيال ميديا وتضيف اللينك في الـ Bio.
Gumroad.com
مناسب للمصممين وبيع المنتجات الرقمية بمختلف أشكالها، من أول قوالب Notion إلى الـPlugins البرمجية والكتب الرقمية.
Picalica.com
موقع تابع لشركة حسوب، وتقدر من خلاله تبيع منتجاتك الرقمية كمصمم ويب أو مبرمج.
Topmate.io
ممكن تستخدمه لخدمات الاستشارات وبيع الخدمات الرقمية من خلال الخطة المجانية.
Icancoachyou.online
موقع مصري تقدر تقدم خدمات الاستشارات حسب تخصصك وخبراتك، عيبه حاجتين الخدمات اللي تقدر تضيفها محدود، كذلك العمولة 25% ودي نسبة عالية على الخطة المجانية.
*فيه مواقع كتير لبيع الخدمات والمنتجات الرقمية باختلاف تخصصاتها، ذكرت بعضها لكن متأكد إنك تقدر توصل لمواقع تانية كتير لو بحثت.
